Biodata

Prissilla Gek nadai penanggul lalu ukai utai ti tusah ba iya deka manggaika diri ba panggau pemerindang. Baru lanjau 17, Prissilla Gek datai ari menua pelilih Kuching lalu ke diatu iya agi besekula di SMK Siburan, Serian.Suah agi dikangauka bala bakih enggau nama timang Prisz. Taja pan agi biak tang mua iya dipeda udah ripu bendar nyadi anak dara. Raut mua ti semampai tampak dipeda nandaka Prissilla mudah dibai berandau, kemerah tang anang ga saru suran salah laba laban Prissilla endang peranak ti bepanggai bendar ba lalau apai indai. Nya kebuah, kini-kini Prissilla, iya tetap ingatka apai indai.

Ngembuan juluk ati deka nyadi jurutera enti mujur. Prissilla anak ke pengkuan ari empat iku diri menyadi. Maya lepa iya rindu ningaka radio mendingka bala DJ ti enda nemu leju merindang bala peninga ninting hari. Kelimpah ari nya, iya mega rindu ke pengawa lumba enggau main sereta belagu. Ke diatu, belagu merindang ukai pengawa ti dikemeranka amat-amat ku iya laban iya agi besekula lalu pelajar nya mih ti nombor satu ba iya. Pengerindu iya ba pengawa nyadi pemerindang tu endang lilih ari apai indai iya empu laban apai enggau indai iya endang orang ke udah lama rindu belagu. Lebuh ke nyaut tanya ba senentang orang ti balat nyukung iya ba pengawa belagu tu dia Prissilla madahka sida iya sebilik mih nyadika penyanding penemu iya kelebih agi apai enggau indai iya empu.

Album keterubah Prissilla suba iya nya album duet begulai enggau Desmond GP ti direkod dalam taun 2006 ba baruh perabung kompeni Galaxy Sound Production iya nya kompeni ti diempu bansa kitai Dayak. Album tu udah mujur bendar dijual. Entara lagu ke bisi dalam album tu iya nya Nagih Pengerindu, Udah Ungkup Tua, Laki Tunjuk 11, Saru enggau mayuh agi. Album duet tu nerima sambut ke manah ari mensia mayuh lalu ari nya mega tumbuh sereta nelesak agi mega pengingin ati Prissilla enggau sida sebilik deka meda Prissilla nyadi siku pemerindang ti pegari ke dudi ila. Prissilla madahka diri chukup puas ati enggau pengelaku album sereta bayar ke diterima iya taja pan nya ukai album iya kediri aja. Iya enggau baruh ati sereta jaku ti ensuruk madahka semua nya endang ketegal sukung ari bala peninga ti udah meli album nya suba laban kenu ku iya, enti nadai orang meli, baka ni mega iya ulih mansang lalu nya tau nasalka juluk ati iya.

Baka artis-artis bukai ti udah ditanya saut kami ngelama tu, Prissilla madahka diri enda ulih ngelarika diri gossip kelebih agi gossip ti sengaja digaga entara sida bela sida ke belajar enggau iya. Kira gossip tundi aja mih nya, pia ku iya. Bedau ga maya tau madahka diri bangat tebilang laban kenu ku iya empu, mayuh agi orang ti udah tebilang ari iya. Nya alai, gossip nya semina dianggap iya enda lebih ari jaku tundi aja.

Ba penemu Prissilla, bala artis kitai Iban ulih mujur ba dunya pemerindang enti nyema sida beserakup lalu nadai ngembuan ati ti dengki ke pangan diri. Enti nyema artis nya udah tebilang, anang mega deka ngeyumbungka diri. Sama-sama mih ngangkatka industri musik kitai Iban ngambika enda jauh tinggal ari bansa bukai, pia ku iya. Senentang artis Iban ke diatu, Prissilla madahka diri rindu ningaka sada nyawa penanyi Urai. Ku iya, sada nyawa penanyi Urai jauh bebida ari penanyi ke bukai. Nambahka nya, Urai chukup regas ba atas panggau maya merindang. Urai nyau majak popular enti dibandingka enggau Urai ke dulu suba. Prissilla nemu laban iya seruran meratika pengerembai Urai ba industri musik. Nambahka nya mega ku Prissilla, Urai mih siku ari artis ti nemu amat begunaka media baka radio tauka majalah. Nya kebuah Prissilla empu mega madahka impak media baka Senawah tauka Pegari endang mai reti ti besai kelebih agi ba dunya pemerindang.